1 mart 2026-cı il tarixində Sumqayıt Olimpiya İdman Kompleksində Aquatlon üzrə Sumqayıt şəhər açıq çempionatı keçirildi. Azərbaycan Triatlon Federasiyasının təşkilatçılığı ilə baş tutan yarışda müxtəlif yaş kateqoriyalarından olan idmançılar iştirak etdi.
Yarış iştirakçıları aquatlonun iki əsas mərhələsi – üzgüçülük və qaçış üzrə bacarıqlarını nümayiş etdirdilər. Tribunalarda valideynlərin alqışları, meydanda isə idmançıların qələbə əzmi hiss olunurdu.
Çempionatın əsas məqsədi uşaqlar və gənclər arasında sağlam həyat tərzinin təbliği, idmana marağın artırılması və gələcəyin triatlon idmançılarının yetişdirilməsinə töhfə vermək idi. Balaca iştirakçılar böyük qələbələrin yolunun kiçik, lakin cəsarətli addımlardan başladığını sübut etdilər.
Yarışın sonunda fərqlənən idmançılar diplom və medallarla təltif olundular. Bu yarışda bütün iştirakçılar idman, iradə və özünəinamın vacib dərslərini yaşadılar.
Azərbaycan Triatlon Federasiyası bu kimi yarışlarla ölkəmizdə triatlon və aquatlon idman növlərinin inkişafına dəstək verməyi davam etdirir.